Paneli i parë me tematikë “Përshpejtimi i reformave për Themeloret: Përafrimi me objektivat e Planit të Rritjes për Ballkanin Perëndimor bazuar në katër shtyllat” ofroi një pasqyrë të gjerë mbi perspektivat dhe sfidat ekonomike të rajonit. Në qendër të diskutimit ishte nevoja për të nxitur bashkëpunimin mes vendeve fqinje për të shtyrë përpara progresin ekonomik. Panelistët theksuan rëndësinë e zbatimit të reformave strukturore për të përmirësuar fusha të ndryshme brenda vendeve respektive. Po ashtu, u vu theksi mbi rëndësinë e nismave për tregun rajonal të përbashkët, duke pasur si prioritet zhvillimin gjithëpërfshirës në shtatë fusha prioritare për të forcuar lidhjen dhe bashkëpunimin rajonal. Diskutimi nënvizoi potencialin e rajonit për të arritur mirëqenie dhe qëndrueshmëri afatgjatë.

Paneli i dytë me tematikë “Mësimet nga zbatimi i Mekanizmit të Shtetit të së Drejtës të BE-së në Shtetet Anëtare dhe implikimet e tij për Ballkanin Perëndimor” theksoi rolin thelbësor që luan shteti i së drejtës në sigurimin e stabilitetit dhe mirëqenies si për vendet anëtare të BE-së, ashtu edhe për Ballkanin Perëndimor. Duke reflektuar mbi përvojat e vendeve të BE-së, u nënvizua rëndësia jetike e pavarësisë së gjyqësorit, kontrollit dhe ekuilibrave efektivë, transparencës, llogaridhënies dhe mbrojtjes së të drejtave të njeriut si shtylla themelore të një sistemi ligjor të qëndrueshëm.